Охрид денеска го чествуваше споменот на свети Наум Охридски, чудотворец, кој, заедно со свети Климент Охридски се најславните ученици на првоучителите и светители Кирил и Методиј. И двајцата се основоположници на Охридската книжевна школа.

По повод празникот, во истоимениот манастир на брегот на Охридското Езеро беше отслужена архијерејска златоустова литургија, со која чиноначалствуваше митрополитот дебарско-кичевски Тимотеј.

На истиот простор се одржа промоција на фотомонографијата „Манастирот Свети Наум Охридски“ од новинарот и публицист Стојан Савески. На промоцијата пригодна реч одржа проф. д-р Сашо Коруновски.

„Станува збор за обемно дело кое низ текст и фотографии, на свој начин, говори за манастирот Св. Наум Охридски. Вложен е голем труд, трпение, а пред се’ голема љубов затоа што се работи за светец кој е почитуван од голем број луѓе без разлика на нивната национална или верска припадност. Задоволство е кога по вложениот труд, непроспаните ноќи, временски рокови, едно вакво дело можете да и’ го претставите на јавноста “, нагласи авторот Савески.

Печатењето на фотомонографијата е поддржано од АД ЕЛЕМ, во рамките на јавниот повик за доделување средства за општествена одговорност на компанијата за 2011 година, а на денешната промоција присуствуваше и генералниот директор на компанијата д-р Влатко Чингоски.